عجزت اطرد زمان راح واقفا عقب ذاك اليوم
عجزت شلون ؟ مدري ؟ كيف ؟ احب اشخاص ولا اكره
وليه اجلس مع بالي وليه استر على المكتوم
مدام الله خلق فيني الشعر ماني بمحتكره
احب اللي فرض ربي قنوع وراضي بالمقسوم
احب الساير التفكير احب اعانق المهره
واحب القمره اللي لاضوها يمحي ضياها نجوم
واحب الليل لعيونك واطاول واعشق السهره
واحب مخاصب العذال وازيد اللوم فوق اللوم
واضيق ان شفت قاع البيد يباس وكلها ندره
خلقني الله شاعر منكبي عزمه قوي عزوم
حماني الله من غــي الزمان وجيت بالفطره
تساومني الليالي وامتلا جسمي عنا وهموم
ومنك الهم لاطول اقول يروح من بكره
وتبقيلي غنيمه لاتقاسمنا حلال القوم
وبقيتلي سحاب الغيث ومنك ماوصلت قطره
واذا انتي بترضين يغزي قلبي شقا وسهوم
تراني مابقا فيني مكان الغزه لابره
تعالي واقربي مني وحلي كربت المضيوم
تعالي وارفقي بي مابقالي فالهوى دبره
تعالي واسمعي مني كلامي والــقدر محتـــوم
تعالي نختم اللي قلت في نبذه ونختصره
تعالي واساليني ليش اعاتب كل يوم ويوم
لاني من كثر ما اعشق اشوف الزول من عشره
الرئيسية 
